بنی جاندن اوصاندیردی جفادن یار اوصانماز می
فلكلر یاندی اخیمدن مرادم شمعی یانماز می
قامو بیمارینه جانان دوای درد ایدر احسان
نه ایچون قیلماز بڭا درمان بنی بیمار صانماز می
شب هجران یانار جانم دوكر قان چشم گریانم
اویاریر خلقی افغانم قره بختم اویانماز می
غل رخسارینه قرشی گوزمدن قانلی اقار صو
حبیبم فصل گلدر بو اقار صولر بولانماز می
غمم پینهان طوتاردم بن دیدیلر یاره قیل روشن
دیسهم اول بی وفا بیلمم اینانیر می اینانماز می
دگلدم بن سڭا معیل سن ایتدڭ عقلمی زایل
بنی طاڭ ایله ین غافل سنی گور گچ اوتانماز می
فضولی رند شیدادر همیشه حلقه رسوادر
صورون كیم بو نه سودادر بو سودادن اوصانماز می
فضولی
