اويان

باق سڭا كيم بويني بوكوك آغلايان؟
حقّ حياتڭ سنڭ اي مسلمان!
قورتار او بيچاره يي اللّٰه ايچون،
آرتيق ئولوم اويقولرندن اويان!

بونجه  زماندر اويودڭ، قانمدڭ؛
چكمدیگڭ قالمدي، اوصلانمدڭ.
چيگنه ديلر يورديڭي باشدن باشه ،
سن يينه  بر كره  قيميلدانمدڭ!

نينني دگل ديڭله ديگڭ ولوله …
كوكره يه رك آقمه ده  مستقبله ،
بر ابدي سيل كه  زماندر آدي؛
هايدي قاتيل سن ده  او جوشقون سله .

قارشي طورولماز، جريان سينه چاك…
وارسه  طورانلر اولور البت هلاك.
طالغه لرڭ آڭلامدن سيرينى،
كوز كوره  كردابه  نه در انحماق؟

دهشت ماضي يي كتير يادينه ؛
كيمسه  يتيشمز يارين امداديڭه .
مرحمتڭ يوق دييه لم نفسڭه ؛
مرحمت ايتمزميسڭ اولاديڭه ؟

”بن اوني دنيايه  كتيردم…“ دييه ،
قالقيشاجقسڭ ديمك ئولديرمه يه !
سوق ايدييورمش مگر انسانلري،
حق ابوّت ده  بو جانيلگه !

طوغريميدر يأس ايله  اولمق تباه؟
يوقمي كلوب غيرته  بر انتباه؟
بكله ديگڭ صبح قيامتميدر؟
كون باتييور، سن آرييورسڭ صباح!

كوزلري ماضی يه  باقان ملّتڭ،
عمري تماديسي اولور نكبتڭ.
قارشوڭه  مستقبلي ديكمش خدا،
كورمه يه ، لكن داها يوق نيتڭ!

اي قوجه  شرق، اي ابدي مسكنت!
سن ده  قيميلدانمه يه  بر نيت ايت.
قورقويورم، غربڭ الندن يارين،
قالماياجق چكمدیگڭ ملعنت.

حق حياتڭ داها چيگننمدن،
قان دوكه رك آلمليسڭ مرد ايسه ڭ.
چونكه  بوكون اورته ده  حق صاحبي،
بر كيشيدر: ”حقّمي ويرمم!“ ديين.